Meditatie morgengebed (in deze vorm ook uitgesproken op radio Drenthe)

Dag volk,

Jonge olders doet vandage de dag heur best um heur kinder een naam te geven waoras zie later met veur de dag kommen kunt. En dat is niet met iedere naam zo. Ik kan mij haost niet veurstellen dat der nao de oorlog nog lu west bint die heur zeun de naam Adolf metgeven hebt. Die naam was jao besmet. Daorum zuukt zie naor een naam die ansprek. Een naam die van dizze tied is. En as dat toch niet zo goed lukt is, kuj aaid nog zeggen tegen zukke mèenschen: ach, as het biesien maor een naam hef, toch? Want zunder naam kuj niet deur ’t leven. Zunder naam zal gieniene je kennen. Zunder naam bi’j een niemand. Zunder naam bliej nargens. Op ien jannewaorie is het de dag dat Jezus zien naam kreg, acht dagen nao zien geboren worden. Dat was zo de gewoonte in Israël en Jezus was gewoon een Jeude, al bint der ok nog zoveul christenmèenschen die dat maor een vrömde gedachte vind. Maor Maria en Jozef hebt gien keuze, wat de naam angiet. Hie mus Jezus hieten, har de engel heur al veurholden, nog veurdat zie hum kregen har. Non was het in Israël zo, dat je naam ok je identiteit bepaolde. Zo mus de prefeet Elia elkenien dudelk maken dat de Heer God was in Israël en dat het volk gien aander goon naolopen zul. En dat is percies wat de naam Elia ok betiekent: de Heer is God.

De naam Jezus betiekent: de Heer redt. En ja, dat mus Jezus zien laoten, dat dat de Heer, de God van Israël een God is die redt. Een God die mèenschen niet an heur lot overlat, die mèenschen niet vallen lat as zie wat fout daon hebt en die lu wel as ienzaom bint opzöcht. Een God die veural het oge hold op de minderman en veur hum opkomp. Een God die mèenschen vrij mak van benauwdigheid. IJ zult maor zo’n naam metkriegen aj nog maor acht dagen old bint en nog gien sjoechem hebt van wat je almaol overkomp en veural: wat je nog almaol boven de kop hangt. Non geleuf ik niet dat elkenien zuk in die tied zo bewust was van de betiekenis van zien naam. Dat zal vast wal niet veul aans west wezen as non bij oes. Der waren ok ik weet niet hoeveul jonkies die as de naam Jezus metkregen. Maor mangs raakt namen oet de guunst. Um wat reden dan ok. Wel nuumt zien kind op ’t heden nog Jan? Niet veul. Van de naam van Jezus moet veul mèenschen ok niks mèer hebben. Toen een leraar met zien klas jongvolk in een museum was, zagen zie daor an de muur een man an een kruus hangen. Jezus, zee een jong van vieftien, dat is gaaf! Maor eh… wel is dat èeinlijk? Ja, de naam van Jezus is oet de guunst bij oes volk. Het is haost een scheldwoord worden….

Wel wil non nog met die naam in verband bracht worden? Wel geleuft nog dat ‘de Heer redt’ inplaots van oeze economen en andere omes die over de centen gaot? In de tied van Elia, ik nuumde hum net al, geleufde dat ok zowat gieniene mèer. En toch…. En toch gung het ok toen op een dag weer de aander kaant op. Ja, het duurde even, maor mettertied kreeg het volk in de smiezen daj met liefde wieder komt in ’t leven as met een zak vol geld of gold. De Heer redt. En die Heer, die God is liefde. Met veul liefde wordt het ankommen jaor 2012 misschien toch wal weer een jaor Anno Domini, een jaor van oeze Heer. Ik gao der in elk geval veur. IJ ok? Dan wèens ik je gèern veul heil en zegen.